Jólarjúpan að nást í hús

Flestir eru búnir að ná sér í jólamatinn með rjúpurnar, en einn og einn er ennþá eftir og um helgina eru síðustu dagarnir á Norðausturlandi og Vesturlandi.  Á Austurlandi má veiða fram til 22. desember, svo ennþá er tími.

„Ég hef ekkert farið núna, það er klikkað að gera hjá okkur þetta árið, alltaf farið á rjúpu,” sagði Jógvan Hansen og sagði þetta tímamót í rjúpnaveiðinni. „Já það hefur verið klikkað að æfa fyrir sýningarnar hjá okkur og þetta gengur frábærlega, frumsýningin var í gærkvöldi,” sagði Jógvan enn fremur.

„Ég á ennþá eftir að ná mér í tvær þrjár, hef tekið labbitúr dag og dag,” sagði veiðimaður á Austurlandi og bætti við; „þetta kemur allt saman, maður nær þessu. Konan fór um daginn og náði í nokkrar í safnið,” sagði veiðimaðurinn í lokin.

Flestir gera sig ánægða með átta til tíu rjúpur sem er bara fínt. Rjúpur í jólamatinn er toppurinn og útiveran er verulega  góð.