Stefnir í þurrkasumar – sjaldan verið minni snjór

„Ég er búinn að fara víða um land og sjaldan séð eins lítinn snjó eins og nú, sumstaðar er bara ekki neitt. Það verður að rigna mikið í sumar ef ekki á að fara illa,“ sagði veiðimaður sem hefur kíkt á stöðuna síðustu vikur og það hafa fleiri gert.

Annar viðmælandi okkar, göngugarpur mikill, oft á fjöllum, segir stöðuna stórundarlega. Sumstaðar sé hvergi snjó að sjá á láglendi, hafði nýlega gengið um Borgarfjörðinn án þess að sjá svo mikið sem snjóskafl.

Já verðurfarið hefur breyst mikið hin seinni árin og snjóalögin minnkað, það verður því að treysta á miklar rigningar yfir sumartímann og það gæti orðið erfitt. Allt getur auðvitað gerst – og það vita allir.

Stóri laxinn er á leiðinni upp Hvítá í Borgarfirði þessa dagana, en fyrsta laxveiðiáin sem opnar í sumar er Þjórsá – en hún er reyndar alltaf vatnsmikil. Auðvitað vona menn það besta en staðreyndin er að snjórinn er minni og minni með hverju ári.