Risafiskur úr Stóru-Laxá í Hreppum
Í morgun veiddist í Bergsnös í Stóru Laxá í Hreppum 108 sentimetra lax og það var Jón Kristinsson sem veiddi þennan risafisk. Þetta er stærsti laxinn sem hefur veiðst í laxveiðiánum í sumar, en lax númer tvö veiddi Nils Folmer Jorgensen í Laxá í Aðaldal fyrr í sumar, sá fiskur var 107 sentimetrar. Nils var í Stóru Laxá fyrir fáum dögum og veiddi vel af laxi.
„Já ég veiddi laxinn í Bergsnös í morgun og var 25 mínútur að landa fiskinum,“ sagði Jón Kristinsson í samtali við veidar.is rétt áðan og bætti við; „við veiðifélagarnir eru búnir að fá 14 laxa í dag, nokkrir staðir í ánni eru pakkaðir af fiski. Eigum ennþá eftir tvo daga í veiði hérna,“ sagði Jón enn fremur.
Stóra Laxá hefur gefið 1300 laxa á þessu sumri en það er helmingi betri veiði en á sama tíma í fyrra.
