Það var Reykvíkingur ársins Kamila Walijewska sem veiddi fyrsta laxinn í Elliðaánum í morgun og var þetta maríulaxinn hennar, en fiskinn veiddi hún á Breiðunni. Það var Stefán Karl Segatta sem var henni til aðstoðar við að landa laxinum.
![](https://veidar.is/wp-content/uploads/2022/06/EllRvik1-768x1024.jpeg)
Fulltrúi borgarstjórnar Reykjavíkur var einnig mættur við opnun Elliðaáa. „Þetta var bara gaman en ég hef aðeins veitt áður og fékk fyrsta laxinn minn í Hörðudalsá í Dölum,“ sagði Einar Þorsteinsson sem var við veiðar aðeins ofar í ánni en hann sest í stól borgarstjóra eftir 17 mánuði. Dagur B Eggertsson var ekki á árbakkanum að þessu sinni, átti 50 afmæli nýverið og var erlendis.
Kamila Walijewska og Marco Pizzolato voru í morgun útnefnd Reykvíkingar ársins 2022, en þau standa fyrir svokölluðum frísskáp í miðbæ Reykjavíkur, þar sem markmiðið er að draga úr matarsóun og byggja upp sterkara samfélag í kringum það að deila umframmat í gegnum frísskápa.
Mynd: Kamila Walijewska og Stefán Karl Segatta með fyrsta laxinn í Elliðaánum á Breiðunni. Mynd Emil Tumi Víglundarsson.